Sábado, 11 de outubro de 2025 – 19:30 h
Centro Sociocultural Ágora (Lugar da Gramela, nº 17, 15010 A Coruña)
A Asociación Cultural Kalos, co patrocinio da Igrexa Evanxélica O Camiño e coa colaboración da Concellaría de Cultura e do Consello Evanxélico de Galicia, organiza un concerto gratuíto de música celta que terá lugar o vindeiro sábado, 11 de outubro de 2025, ás 19:30 horas, no Centro Sociocultural Ágora da Coruña.
O grupo Saoghal ofrecerá un programa que convida a realizar unha viaxe musical polas terras de Irlanda, Escocia, Bretaña e Galicia, nunha proposta que combina a forza da tradición celta coa sensibilidade contemporánea.
Este concerto inscríbese dentro dos actos conmemorativos do 150 aniversario da presenza e servizo da Igrexa Evanxélica na cidade da Coruña, institución que, ao longo da súa historia, mantivo un firme compromiso coa axuda social, a educación, a defensa da liberdade de pensamento e a transmisión dunha mensaxe de esperanza.
A música ocupou sempre un lugar destacado na vida e na práctica comunitaria da Igrexa Evanxélica. Desde a Reforma Protestante do século XVI, que incorporou a música popular aos himnos congregacionais, o canto foi un medio de expresión da fe, de renovación espiritual e de encontro con Deus. Na actualidade, a música evanxélica continúa a evolucionar e abrangue unha ampla diversidade de estilos, sen perder a súa esencia nin o seu propósito.
Neste contexto, o grupo Saoghal representa unha expresión contemporánea desa tradición. Nacido dos campamentos musicais organizados durante anos pola Igrexa Evanxélica en Toral de los Guzmanes, o conxunto está integrado por músicos procedentes de distintas cidades de España, unidos pola súa paixón pola música e pola súa fe compartida. Fundado en 2015, Saoghal combina instrumentos e sonoridades propias do estilo celta-rock cunha mensaxe inspiradora que busca transmitir esperanza e alegría.
O concerto é de entrada libre ata completar aforo e constitúe unha oportunidade excepcional para gozar da calidade interpretativa de Saoghal e celebrar, a través da música, un legado de fe e servizo que se estende ao longo de século e medio.
Data: Sábado, 11 de outubro de 2025
Hora: 19:30 h
Lugar: Centro Sociocultural Ágora – Lugar da Gramela, nº 17, 15010 A Coruña
Entrada libre ata completar aforo